ҚР Мәдениет және спорт министрлігі аппаратының басшысы Ұлттық архивтің жұмысымен танысты

Қазақстан Республикасы Ұлттық архивінің директоры Нұрланова Сағила Есімсейітқызы мен орынбасары Құсайынова Тұрсынгүл Жағыпарқызы оған архив ғимаратында орналасқан көрмелерді көрсетіп, қоймаларда сақтаулы тұрған құнды құжаттармен таныстырды.

Сонымен қатар, аппарат басшысы Ұлттық архивтің базасында ашылған Мемлекеттік және ведомстволық архив қызметкерлерінің біліктілігін арттыру орталығының жұмысымен танысып, архившілерді дайындау методикасын жетілдіруде өзіндік ұсыныстарымен бөлісті.

Келесі кезекте Жанат Сабыржанұлына Ұлттық архив қорын толықтыру бөлімі, Құжаттарды пайдалану бөлімі және Жариялау-баспа бөлімінің жұмыстары таныстырылып, аталған бөлім қызметкерлерінің нақты қандай жұмыстармен айналысатыны көрнекі құралдар көмегімен көрсетілді.

Сондай-ақ, аппарат басшысы Архивтік технологиялар мен цифрландыру бөлімде болып, «Е-Архив» электронды порталының жұмысымен, ұлттық архив қорын цифрландыру жұмыстарымен танысты.